Déja vu? Nee, Vuja De!

Jy het sekerlik al gehoor van déja vu - daardie vreemde gevoel dat jy vantevore op 'n plek was, selfs al was jy nog nie daar nie. Wel, wat ook van 'n Vuja De gevoel? Wat van 'n omgekeerde manier van leef? Dink bietjie - wat sou gebeur as jy jou lewe begin leef asof jy dit vandag vir die heel eerste keer beleef? Dink jy nie dit sal jou totale ingesteldheid verander as jy daagliks van voor af begin met jou huweliksmaat, jou vriende, jou kollegas - ja, sommer met alles en almal rondom jou nie? Sal dit nie asemrowend wees as jy elke aand jou wrokke vergeet en daardie swart notaboekie opskeur wat jy stilletjies in jou hart in stand hou nie?



Weet jy, God doen elke dag Vuja De met jou en my. Hy begin daagliks oor en voor met ons. Sy genade is elke oggend kraakvars en nuut soos wat Klaagliedere 3 vir ons leer. Die Here vernuwe ons elke dag innerlik, soos wat Paulus glashelder in 2 Korintiërs 4:16 sê. Die apostel skryf dat al vergaan ons uiterlik, dan maak God ons nogtans elke dag innerlik nuut.



Volg vandag in die Here se voetspore! Begin nuut. Begin voor. Begin oor. Wees leergierig. Wees onversadigbaar nuuskierig. Leef asof die lewe vandag vir die heel eerste keer aangebreek het en alles vanaand tot 'n einde gaan kom. Delf met oorgawe in God se skatkamers rond op soek na nuwe hemelse skatte. Word 'n fynkenner van die nuutste wonders wat Hy verrig. Leef van nou af op die Vuja De roete. Dan bruis daar ware lewe in jou hart.





Ek bid

Heer Jesus, dankie vir vandag

Dankie dat dit nuut en vars aan ons elkeen geskenk is

Dankie vir vandag se wind en son

Ook vir die reën en onweer

Dankie vir elke stukkie brood op my tafel,

en vir al die klere in my kas

Dankie vir mense rondom my

Laat ek vandag 'n lewende seën vir hulle elkeen wees

Amen


met komplimente van ekerk.

Baie dankie.

Dit laat n mens nogals nadink.